بسم اللہ الرحمٰن الرحیم

السلام وعلیکم ورحمتہ اللہ وبرکاتہ قارئین کرام

بہت دیر سے کمپیوٹر کے سامنے بیٹھا سوچ رہا ہوں کہ صحیح بخاری کا تعارف کرواؤں تو کیسے؟ دورِ جدید کا المیہ یہ ہے کہ ہم مسلمان فرقوں ،گروہوں ، پارٹیوں اور مسلکوں میں بڑی تعداد میں بٹ چکے ہیں اور اپنے اپنے گروہ کیلئے تعصب رکھنا باعث فخر جانتے ہیں۔  بہرحال، اس تصویر کا دوسرااچھا رخ یہ ہے کہ فرقہ واریت اور عصبیت کے باوجود ہم سب کا اللہ ایک ہے ، رسول ایک ہے، کعبہ ایک ہے ، جنت کی لالچ بھی وہی ہے اور جہنم کا ڈر بھی یکساں ہے، دین بھی ایک ہے اور قرآن بھی ایک۔  اس پرفتن دور میں ہم مسلمانوں کو بھی ایک ہونے کی اشد ضرورت ہے ۔ اس کیلئے راستہ بھی صرف ایک ہے اور وہ یہ ہے کہ سب مسلمان اللہ کی رسی یعنی دین کے اصل ماخذ کو اپنا عملی راہنما تسلیم کریں۔ اور ہمارے دین کا ماخذ بھی الحمد اللہ ایک ہی ہے اور وہ ہے قرآن اور صحیح احادیث۔

صحیح احادیث اگرچہ ہزاروں کی تعداد میں مختلف کتب میں بکھری پڑی ہیں۔ لیکن جو مقام حدیث کی سب سے اعلٰی کتاب صحیح بخاری کو حاصل ہے وہ مقام دوسری کسی کتاب کو آج تک حاصل نہ ہو سکا۔ اہلحدیث کے علاوہ  دیوبندی، بریلوی، جماعت المسلمین اور توحیدی سب کے نزدیک قرآن کے بعد روئے زمین پر صحیح ترین کتاب صحیح بخاری ہے۔  اور الحمد للہ، صحیح بخاری کی تمام مرفوع متصل احادیث بالکل صحیح ہیں۔ کسی حدیث کے ضعف کا بالکل ڈر نہیں۔ اور یہی بات صحیح بخاری کو دوسری سب حدیث کی کتابوں سے ممتاز کرتی ہے۔ اللہ تعالٰی کا انتہائی فضل و کرم  اور احسان عظیم ہے کہ انٹرنیٹ پر اللہ تعالٰی نے یہ خدمت اہلحدیث حضرات سے لی ہے ، مکمل صحیح بخاری آج سے تین چار سال پہلے سے انٹرنیٹ پر موجود اہلحدیث کی مختلف ویب سائٹ پر مفت ڈاؤنلوڈنگ کیلئے موجود ہے۔  وہ قارئین جن کے انٹرنیٹ کی اسپیڈ بہتر ہے، وہ میرے اس فولڈر کے بجائے  مندرجہ ذیل لنک سے صحیح بخاری کی تمام آٹھ جلدیں ڈاؤنلوڈ کر سکتے ہیں یاد رہے کہ ہر جلد کا سائز کم و بیش پچاس ایم بی ہے۔

http://www.islamhouse.com/pg/9358/books/1

راقم الحروف کو بھی باوجود ڈی ایس ایل کنکشن کی سہولت میسر ہونے کے صحیح بخاری کو ڈاؤنلوڈ کرنے میں انتہائی دقت کا سامنا کرنا پڑا۔ ظاہر ہے کہ وہ افراد جو ڈائل اپ کے ذریعے انٹرنیٹ سے کنکٹ ہوتے ہیں، ان کیلئے تو اس کو ڈاؤنلوڈ کرنا قریباً ناممکن ہے۔  انہی بھائی بہنوں کی سہولت کیلئے میں نے یہاں صحیح بخاری کو جلد کے حساب سے اپ لوڈ کرنے کی بجائے، باب کے حساب سے اپ لوڈ کیا ہے۔ 

اس کی وجہ سے فائلوں کی تعداد ایک سو سے زائد ہو چکی ہے، لیکن اگر روزانہ چند فائلیں ڈاؤنلوڈ کر لی جائیں تو کچھ ہی دنوں میں آپ اس عظیم خزانے کے مالک ہو سکتے ہیں۔

ان فائلوں کا نام بھی ایسا رکھا ہے کہ آسانی سے جلد کا پتہ بھی چل سکتا ہے۔ ہر فائل کا نام عربی اور اردو دونوں میں لکھا گیا ہے تاکہ سرچ کرنے میں کچھ سہولت ہو، اور نام سے پہلے عدد اور انگلش کے حرف تہجی پر مشتمل ایک کوڈ بھی ہے ۔ عدد دراصل جلد نمبر کو ظاہر کرتا ہے اور انگلش حرف تہجی اس جلد میں موجود باب کو ترتیب سے ظاہر کرتے ہیں۔  اس سے یہ فائدہ ہوگا کہ آپ جب ان فائلوں کو اپنے کمپیوٹر میں محفوظ کریں گے تو سب فائلیں خود بخود ترتیب سے محفوظ ہوتی چلی جائیں گی۔ جنہیں آپ بعد میں کوئی بھی پی ڈی ایف رائٹر کا سوفٹ ویئر استعمال کرتے ہوئے جلد کے حساب سے جوڑ بھی سکیں گے۔

ویسے تو بحمد للہ یہ پروجیکٹ مکمل ہو چکا ہے۔  لیکن اب بھی اس میں کچھ مزید اچھی چیزیں شامل کی جاسکتی ہیں۔  میں کوشش کر رہا ہوں کہ صحیح بخاری کی تمام جلدوں میں آنے والے مضامین اور تشریحی مضامین کی فہرست کو اردو یونی کوڈ میں ٹائپ کر کے یہاں شیئر کر دیا جائے۔ تاکہ کسی عام مسلمان کو بھی جب کسی مسئلہ کے بارے میں صحیح احادیث کی تلاش ہو تو وہ متعلقہ الفاظ لکھ کر ان کو سرچ کرے اور صحیح بخاری میں موجود اس ٹاپک سے متعلقہ تمام معلومات اس کے سامنے آجائیں۔  اللہ تعالٰی سے اس کام کو کرنے کی توفیق کا طلب گار ہوں۔ اللہ آسانی فرمائے ۔ آمین

میرے دوسرے فولڈرز میں موجود سینکڑوں دیگر اردو اسلامی کتب کو مفت ڈاؤنلوڈ کرنے کیلئے اوپر میری اٹیچ کردہ تصویر یعنی کلمہ شریف پر کلک کیجئے یا مندرجہ ذیل ویب ایڈریس پر جائیے۔

www.esnips.com/user/truemaslak

آخر میں آپ سے شدت سے دعاؤں کی درخواست ہے۔

والسلام

محمد شاکر